Удзел кіраўніцтва БелГПП у мерапрыемствах Міжнароднага тыдня бізнесу ва Уфе

Намеснік старшыні Беларускай гандлёва-прамысловай палаты Алена Маліноўская прымае ўдзел у мерапрыемствах дзелавога форуму «Міжнародны тыдзень бізнесу – 2024».

Форум праходзіць 3–6 снежня ў сталіцы Рэспублікі Башкартастан – горадзе Уфе.

Міжнародны тыдзень бізнесу – гэта штогадовая прафесійная пляцоўка, дзе абмяркоўваюцца актуальныя пытанні і развіваецца дыялог паміж дзяржавай і бізнесам. Удзельнікі абменьваюцца вопытам, абмяркоўваюць дзейныя праекты, перспектывы развіцця супрацоўніцтва ў галінах эканомікі, экспарту, інавацый і інвестыцый.

Тэма першага дня Міжнароднага тыдня бізнесу – Дзень прадпрымальніцтва. Адбыўся шэраг тэматычных секцый па пытаннях медыцынскага турызму, цыфравізацыі розных галін эканомікі, развіцця індустрыі Халяль, прасоўвання тавараў на маркетплейсах, рэалізацыі сумесных эканамічных праграм развіцця, станаўлення малога і сярэдняга бізнесу, уплыву крэатыўных індустрый на эканоміку рэгіёну.

Алена Маліноўская была адным са спікераў сесіі «Саюзная дзяржава: перспектывы сумесных эканамічных праграм развіцця». У сваім выступленні яна акцэнтавала ўвагу на тым, што сёлета спаўняецца 25 гадоў Саюзнай дзяржаве, і ўсе гэтыя гады эканоміка і прамысловая кааперацыя былі стрыжневымі напрамкамі ўзаемадзеяння. У якасці прыкладу намеснік старшыні БелГПП прывяла паспяхова рэалізаваныя праекты прамысловай кааперацыі Беларусі і Башкартастана, якія даказваюць, што вытворчасці бакоў узаемадапаўняльныя і ў кааперацыі яны вырабляюць гатовы канкурэнтаздольны прадукт.

Гаворачы аб далейшым паглыбленні і пашырэнні прамкааперацыі, намеснік старшыні Беларускай гандлёва-прамысловай палаты падрабязна спынілася на розных узроўнях падтрымкі: ад рэгіянальнага (праект Расійска-Беларускага інвестыцыйнага кластара, які дае магчымасць скарыстацца перавагамі, якія прадастаўляюцца рэгіёнам) да падтрымкі ў фармаце Саюзнай дзяржавы (міждзяржаўны), якая ўжо паказала прыкладную прымянімасць у частцы адзінай прамысловай палітыкі і пацвярджэння вытворчасці прамысловай прадукцыі), а таксама ў рамках усяго Еўразійскага эканамічнага саюза (міжнародны ўзровень, які ўключае падтрымку праектаў з трох і больш дзяржаў ЕАЭС). «Створаны спрыяльныя ўмовы для нарошчвання прамысловай кааперацыі паміж беларускімі і расійскімі прадпрыемствамі. Важна актыўна карыстацца перавагамі і ствараць сапраўды запатрабаваны прадукт», – рэзюмавала Алена Маліноўская.

Тэматыка наступных дзён Міжнароднага тыдня бізнесу: «X Агульнарасійскі юрыдычны форум» (4 снежня); «Ялцінскі міжнародны эканамічны форум» (5 снежня); 6 снежня – «Міжнародны тыдзень бізнесу».

Пленарнае паседжанне адбудзецца 4 снежня.

У рамках форуму таксама пройдзе выстава і В2В-перамовы, дзе госці і ўдзельнікі змогуць пазнаёміцца ​​з вопытам сваіх калег і пашырыць спіс дзелавых кантактаў. Акрамя таго, адбудзецца ўзнагароджанне спецыялістаў у сферы дзяржаўнага кіравання і бізнесу.